زكرياء_فتحاني : أمير على عرش أكبر شركة ديال التسويق الشبكي في المغرب

قصة_رجل_أعمال 8 :

زكرياء_فتحاني : أمير على عرش أكبر شركة ديال التسويق الشبكي في المغرب 



زكرياء فتحاني الملقب ببيل غيتس ديال المغرب ، عندو ستة و عشرين عام ... واخا باقي صغير استاطع يقنع 52 ألف مغربي من الطبقة الفقيرة و المتوسطة: رجال سلطة، أساتذة، بوليس ، تجار و حرايفية، طلبة ، و أكثرهم من الشوماج ... باش يستثمرو في المقاولة ديالو «لورن أند أورن» مقابل وعد بأرباح على كل استثمار كتوصل حتى ل2٪ يوميا ... و في ضرف ديال 3 ديال السنين أصبح رأسمال الشركة 15 مليار سنتيم ...

زكرياء أسس شركة L&E COSMETIQUE سنة 2013 بشكل قانوني ؛ كشركة ذات مسؤولية محدودة ، كيحترم فيها جميع المساطر القانونية ... الاسم ديال الشركة هو خليط ما بين الإنجليزية و الفرنسية، ، لأن COSMETIQUE كلمة فرنسية و الصحيح هو COSMETICS ... ماعرفتش واش كان خطأ لغوي و لا كان مقصود ... و المهم بدات الشركة و أول منخرط كان هو زكرياء اللي كان كيتنقل لمق الشركة في الطوبيس و اللي استطع يقنع بعض المقربين و بعض االفرنسيين و التونسيين ... أما المغاربة كان المشروع غامض بالنسبة ليهم في الأول ... لأن زكرياء اعتمد على مبدأ ديال " الطماع يقضي عليه الكذاب" و اللي معروف في المعجم ديال رواد الأعمال بالتسويق الشبكي و الهرمي اللي ظهر في أمريكا في الثلاثينات و تمنع قانونيا في مجموعة من دول العالم لأنهم كيعتبروه نظام ديال النصب أكثر من نظام تجاري ... هاد النظام اللي كيعتبرك خدام مع الشركة خاصك تقنع ناس أخرين بالانخراط و كتستثمر بشوية ديال الفلوس و كتربح بزاف بأقل مجهود و ماكتخسر والو في حالة فشل المشروع من غير القيمة اللي استثمرتي بيها في الأول ...

أغلبية ديال المنخرطين في الشركة استثمرو بمبلغ ما بين 5000 درهم حتى ل 15 ألف درهم و كيلتزمو بدفع 800 درهم كل 3 أشهر (كتشري المنتوج بزز عليك) باش تحصل على أرباح كتوصل حتى 730 في المئة ... هاد الأرباح اللي اعتبروها الخبراء كتشبه الأرباح ديال البورصة و مايمكنش تكون اقتصاديا ...

الشركة كتعمل على تسويق 60 منتج مغربي ديال الشعر و التجميل ... و خدامة على تطوير 25 منتج أخر .... حصلت على شهادة المصادقة من وزارة الصحة و معهد باستور و اعتماد من طرف منظمة ألمانية ... لحدود الساعة حتى واحد ماعرف المصانع و لا مخازن باش تخزن فين كتخزن المنتج ديالها ، اللهم بعض النماذج القليلة المعروضة بمقر الشركة بشارع عبد المومن بالدار البيضاء ... استطاعت الشركة تخلق 22 ألف منصب شغل غير مباشر و كتشغل 150 شاب مغربي بشكل مباشر و باعت جوج ديال المليون وخمس مائة ألف منتوج ، و قامت بـ 80 ألف تحويل بنكي لفائدة الأعضاء ديالها ... و حاليا فاتتحت 6 ديال المتاجر على الصعيد الوطني و أسست أكاديمية باش تكون الموزعين ديالها في تقنيات الاقناع و التسويق و البيع و تعرفهم على المعلومات الضرورية للاشتغال ...

منين صادقت الحكومة على نظام المقاول الذاتي ... كانت فرصة أمام زكرياء باش يحمي نفسو قانونيا و باش يتهرب من الضريبة بنسبة كبيرة منين فرض على جميع المنخرطين يتسجلو في هاد النظام الجديد باش يقدرو يسحبو الأرباح ديالها و هكدا أصبح كل منخرط في الشركة عندو صفة ديال مقاول و كيتعامل مع الشركة كموزع أو كليان ماشي كمستثمر ... و أصبح مفروض على كل عضو يصرح بالحسابات ديالو لمصلحة الضرائب كل شهر أو 3 أشهر و يخلص 2 في المئة ديال الضريبة على الدخل اللي كانت غادي تخلصها الشركة ب 35 في المئة تقريبا ... مؤخرا تقدم بنك المغرب والسلطة المغربية لسوق رؤوس الأموال بشكاية ضد الشركة عند الوكيل العام للملك اللي حجز على حساب الشركة و القضية باقية حاصلة لحدود الساعة ...

زكرياء فتحاني هو مقاول ناجح و استثنائي في المغرب سواء كان نصاب أو معقول في المشروع ديالو لأنه قنع المغاربة في واحد الوقت اللي مابقاش بنادم كيثيق في راسو و صنع ثروة لنفسو في و وقت قصير ... و حقق جزء من الحلم ديالو و جعل الأحلام ديال 52 ألف مغربي بين يديه ...

المصدر صفحة : رجل أعمال بدون رأس المال

موعدنا مع قصة جديدة و رجل أعمال أخر ...